XƏBƏRLƏR

01.08.2018 13:07
Nazirlik “Qızıl Kəlmə” Ədəbi Mükafatına əsərlərin qəbulunu elan etdi    

Mədəniyyət Nazirliyi 2018-2019-cu illər üzrə yüksək bədii və sənətkarlıq keyfiyyətlərinə malik ədəbi əsərləri dəyərləndirmək, təbliğ etmək, istedadlı ədiblərin səmərəli yaradıcılıq axtarışlarına zəmin yaratmaq məqsədi ilə “Qızıl Kəlmə” Ədəbi Mükafatına əsərlərin qəbulunu elan edir.

Bu haqda AzEdu.az.az-a nazirlikdən bildirilib.  

Mükafata aşağıda göstərilən ədəbi janrlarda yaradılmış, son 2 ildə kitab və ya jurnalda çap edilmiş əsərlər təqdim olunur: 

– nəsr əsərləri (roman, povest, hekayə və hekayələr silsiləsi);

– poeziya əsərləri (poema, şeirlər və mahnı mətnləri);

– tənqid, ədəbiyyatşünaslıq və publisistika əsərləri;

– orijinaldan bədii tərcümə əsərləri;

– uşaqlar üçün yazılmış bədii əsərlər. 

Mükafata təqdim edilən namizədlər üçün yaş məhdudiyyəti yoxdur.

Mükafat iki ildən bir may ayının ilk ongünlüyündə verilir.

Mükafat rəmzi simvol (döş nişanı), diplom və pul mükafatından ibarətdir. 

Namizədlərin irəli sürülməsinə dair elan mətbuatda dərc edildikdən sonra yaradıcılıq təşkilatları, nəşriyyat, redaksiyalar və əvvəllər Mükafata layiq görülmüş şəxslər namizəd irəli sürə bilərlər.

Bir təşkilat, şəxs Mükafata hər nominasiya üzrə yalnız bir namizəd təqdim edə bilər.

Təqdimat aşağıdakı sənədlərdən ibarətdir: 

Əsəri təqdim edən təşkilatın, şəxsin Mükafat Komissiyasına ünvanlanmış məktubu; 

Çap edilən əsər (5 nüsxə);

Namizədin tərcümeyi-halı və 1 ədəd fotoşəkli;

Şəxsiyyət vəsiqəsinin surəti;                                                                                                                                                                                                                       

Müəllifin digər işlərinin siyahısı (əgər varsa);

Əsər barədə rəylər və nəşr edilən yazılar (əgər varsa). 

İşlər 2018-ci il avqust ayının 1-dən – 2019-cu il mart ayının 29-u son təqdimat günü olmaqla  bu ünvana təqdim edilməlidir: AZ 1000, Bakı şəh., Ü.Hacıbəyli küç. 84, Hökumət Evi, 3-cü mərtəbə, 308-ci otaq. Tel: 012 493 23 77

İlin gənc müəllimi-Müraciət formu