Azedu.az
https://modern.az/ https://www.instagram.com/apak.az/
2020-02-28 17:45:00
“Universitetlərdə akademik tədqiqatların kommersiyalaşması: Beynəlxalq reallıqlar və yeni çağırışlar”

Azərbaycan Dövlət İqtisad Universitetində (UNEC) “Universitetlərdə akademik tədqiqatların kommersiyalaşması: Beynəlxalq reallıqlar və yeni çağırışlar” mövzusunda konfrans keçirilib.

 Konfransda Əqli Mülkiyyət Agentliyinin İdarə heyətinin sədri, professor Kamran İmanov, AMEA-nın vitse prezidenti, akademik Dilqəm Tağıyev, UNEC-in rektoru, professor Ədalət Muradov, tanınmış elm xadimləri, ictimaiyyət nümayəndələri və universitetin professor-müəllim heyəti iştirak edib.

 Rektor Ədalət Muradov ölkə Prezidentinin sərəncamı ilə ölkədə 27 martın Elm Günü kimi qeyd olunmasını nəzərə alaraq, UNEC-də “Elm aylığı”na start verildiyini və ali məktəbdə 20-dən çox müxtəlif elmi tədbirlərin keçirilməsinin nəzərdə tutulduğunu bildirib.

 Rektor aparılan elmi tədqiqatların nəticələrinin kommersiyalaşdırılması üçün onun nəticələrinin elm dünyasına ötürülməsinin tələb olunduğunu qeyd edib. UNEC-də bu istiqamətdə əldə olunan uğurlu nəticələrdən danışan Ə.Muradov, son 5 ildə universitet əməkdaşlarının beynəlxalq indeksləşdirilmiş mənbələrdə çap  olunan məqalələrinin sayının 51,6 dəfə artdığını, 1991-2019-cu illərdə Web of Science-də çap olunan məqalələrin 89,5%-nin məhz son 5 ilin payına düşdüyünü deyib. O,  elmi tədqiqatların stimullaşdırılması sisteminə uyğun olaraq, universitet büdcəsindən son 4 ildə 2 milyon manata qədər vəsaitin xərcləndiyini, təkcə reytinq sisteminin tətbiqi ilə əlaqədar, illik orta hesabla 430 min manatdan çox əlavə ödənişlər edildiyini diqqətə çatdırıb.

 Ə.Muradov universitetin tədqiqatçı müəllimlərinin aldığı patentlərin sayına və bu istiqamətdə aparılan stimullaşdırıcı tədbirlərə də toxunub. Əqli Mülkiyyət Agentliyinin tabeliyində olan Patent və Əmtəə Nişanlarının Ekspertizası Mərkəzində qeydiyyatdan keçmiş UNEC-in ixtira və faydalı modellərinin sayının 2015-ci ildə 1, 2016-ci ildə 1, 2017-ci ildə 4, 2018-ci ildə 2, 2019-cu ildə 3 olduğunu bildirib. O, patentlərin kommersiyalaşdırılması ilə bağlı təkliflə çıxış edib. UNEC-də tədqiqatların kommersiyalaşdırılmasının institutlaşdırılması işini birgə təhlil etməklə bu sahədə yaradılacaq yeni institutun birgə idarəedilməsi məsələsinin vacibliyini deyib, universitetin müvafiq şöbəsinin büdcəsi həcmində həmin layihənin maliyyələşdirilməsinin mümkünlüyünü qeyd edib.

 Əqli Mülkiyyət Agentliyinin İdarə Heyətinin sədri, professor Kamran İmanov  “Əqli mülkiyyət və elmi-tədqiqat nəticələrinin kommersiyalaşdırılması” mövzusunda tədqimatla çıxış edib. Təqdimatda  milli innovasiya sistemlərinin modelləri, bilik iqtisadiyyatına aid olan sahələrin ÜDM-dəki payı, ixtiralarla bağlı göstəricilərin dinamikası açıqlanıb. Eyni zamanda kommersiyalaşma ilə bağlı ali məktəblərin qarşısında duran vəzifələrdən söz açılıb. K.İmanov ölkədə innovasiya potensialının nəticələrdən daha yüksək olduğunu diqqətə çatdıraraq, imkanlardan səmərəli istifadənin vacibliyini vurğulayıb. Elmi fəaliyyətin müasir modelinin 3.0 universitet səviyyəsinə qaldırılmasında önəmli  məqamları açıqlayıb. Ölkədə biliklərə əsaslanan cəmiyyətin formalaşdırılmasının və insan kapitalına investisiyaların qoyuluşunun dövlətin strateji məqsədlərindən olduğunu deyən K.İmanov universitetlərlə birgə əməkdaşlığın bu sahəyə böyük töhfələr verəcəyini bildirib.

 Konfrans İqtisadiyyat üzrə Nobel mükafatçıları Maykl Kremer, Ester Duflo və Abhicit Banerci haqqında məruzələrin dinlənilməsi üzrə panel iclasında işini davam etdirib.(Azərbaycan müəllimi)