Böyük şəxsiyyətlərin şəninə tərif söyləmək, yazmaq çox çətindir. Çünki yazılacaq yazı, deyiləcək söz nə qədər müdrikcəsinə deyilsə də, böyük adamın əməllərini, gördüyü işlərin genişliyini, dərinliyini ifadə edəcək qüdrətdə olmur. Böyük arzular əmələ çevriləndə, onu ifadə etməyə sözün qüdrəti də çatmır. Onun üçün də mən ənənəmə sadiq qalıb akademik İsa Həbibbəylinin 65 illik yubileyi münasibətilə sadəcə xatirələrimi və düşüncələrimi yazmağı qərara aldım.
Akademik İsa Həbibbəyli...
Düz bir il bundan öncəyə qədər bu ad mənim üçün Naxçıvan Dövlət Universitetini yenidən quran və dünyaya tanıtdıran bir rektor, Cəlil Məmmədquluzadə yaradıcılığının fundamental araşdırıcısı, Azərbaycan elminin inkişafı naminə fədakar bir alim mücəssəməsi, Akademiyanın vitse-prezidenti, Milli Məclisin deputatı, Nizami adına Ədəbiyyat İnstitutunun direktoru, dövlətçilik yollarında Ulu Öndər məktəbinin layiqli nümayəndəsi mənalarını ifadə edirdi. Bu cür assosiasiya Akademik İsa Həbibbəyli adını eşidən hər kəsdə yaranır. Çünki Akademikin uzunmüddətli yorulmaz fəaliyyəti onu görünən məğrur və qürurlu bir dağ kimi ucaltmış, elmi və siyasi camiyyədə sevdirmişdir. İsa Həbibəyli görkəmli elm xadimi, təhsil adamı kimi xalqımız tərəfindən sayılıb-seçilən bir ziyalıdır. Bütün bu qeydlərim, sanki görünən dağı ifadə edir... O dağı ki, bir tərəfi sərt qayalar, bir tərəfi yaşıllıqlar olan yer səthində məğrur, qürurlu, yenilməz və müdrikcəsinə ucalmışdır.
Bu gün isə İsa Həbibbəyli adı mənim üçün tamamən başqa bir məna ifadə edir, bunun adı doğmalıq, səmimilik və dostluqdur.
Cəmiyyətimizdə var olan bu cür ziyalıların siyasi, elmi, ictimai fəaliyyətini mətbuatdan izləyir, oxuyur və müəyyən fikirlərdə oluruq. Bəzən isə onlar haqqında haqlı və ya haqsız şəkildə mühakimə yürüdür və fərqli fikir formalaşdırırıq. Bu cür komplekslərlə uca dağa yaxınlaşmağın mümkün olmadığını, çətinliyini, qəlbinə gedən yolların keçilməzliyi ilə aramızda bir məsafə yaradırıq. Lakin görünən dağın qəlbindəki zənginliyi, sərinliyi, istiliyi, böyüklüyü, sevgini görmək üçün ona yaxın getmək və uzaqdan böyük görünən bu dağın hər parçasını incələmək və tanış olmaq lazımdır.
Bir neçə il idi ki, doktoranturaya qəbul olmaq üçün cəhd edirdim. Gah özümdən, gah da digərlərindən asılı olaraq bu iş alınmırdı. Bir gün qərar verdim ki, yenidən müraciət edim. Nəzərdə tuturdum ki, bu münasibətlə Nizami adına Ədəbiyyat İnstitutunun yeni direktoru Akademik İsa Həbibbəylini təbrik edər, ədəbiyyat sahəsində gördüyüm işlər haqqında ona məlumat verər, öz timsalımda gənclərin fəaliyyəti ilə onu tanış etmiş olaram.
İstədiyimdən artıq oldu... Heç bir zaman ünsiyyətimiz olmayan, heç bir yerdən şəxsi tanışlığımız olmayan bu səmimi ziyalı ilə görüşdüm. Müəllifi və redaktoru olduğum bir neçə kitabı hədiyyə etdim. Doktoranturaya qəbul olmaq arzumu dilə gətirdim. Birinci görüşümüz qısa oldu: “Sənədlərini ver baxarıq”, – dedi. Bir neçə həftədən sonra sənədlərimi elmi katibliyə verdim və yenidən görüşdük... Bu dəfə isə İsa müəllimin yaratdığı səmimi münasibətdən cürətlənib təsis etmək istədiyim pyes müsabiqəsi haqqında da danışdım, dəstəyini istədim. Böyük həvəslə bu məsələdə yanımızda olacağanı dedi. Hətta yerindəcə müsabiqənin adının “Anamın kitabı” olmasını təklif etdi. Mənim romantik Cavid sevgisi ilə yaratmaq istədiyim bu müsabiqəyə realist Cəlil sevgisi də daxil oldu. Bir az nə işlə məşğul olduğum haqqında məlumat istədi. Beləcə, bir dəfə də görüşdük... Və dördüncü görüşümüzün təşəbbüskarı İsa müəllim oldu. Həmin ərəfədə akademik Teymur Kərimlinin yeni vəzifəyə getdiyi üçün, onun vəzifəsini mənim tutmağımı istədiyini dedi. Elə hökmlə, elə inamla dedi ki, nə müzakirə etməyə, nə də düşünməyə imkanım oldu. Çünki bu təklifin arxasında müdrik bir insanın gəncliyə olan inamı, etibarı dururdu. Beləliklə, mənim doğma Ədəbiyyat İnstitutunda doktorant olmaq arzum birdən-birə bu mötəbər elm ocağında direktor müavini olmaqla bitdi. İsa müəllimin bu təklifini, addımını onun gənclərlə işləmək, gəncləri önə çəkmək, gəncliyə stimul vermək kimi qiymətləndirirəm. Çünki bir gənc kimi mən də öz qınıma çəkilib, təhsilimiz və elmimiz üçün gücüm çatan dərəcədə müstəqil fəaliyyət göstərirdim. Mənim kimi, bir çox gənc var ki, dövlət və millət üçün heç kimdən heç nə gözləmədən əməli işlər görür. Lakin dövlətçiliyimizin sadiq carçısı, elmimizin fədakar insanlarından biri olan İsa müəllim kimi ziyalılarımız əllərini gəncliyin çiyninə qoyduqları, onlara daha işıqlı yol göstərmək arzusunda olduqları zaman dövlətimiz və millətimiz üçün xeyirli və uğurlu olur.
Elə buna görə də İsa müəllim haqqında düşündüyüm zaman onun elmi, siyasi fəaliyyəti ilə bərabər, insani keyfiyyətlərinə daha çox heyranlıq duyuram. Çünki çox az insan olur ki, siyasi fəaliyyət göstərərək həm dövlətin, həm də xalqın etibarını itirməsin, simasını dəyişməsin. İsa müəllim elmi, ictimai-siyasi fəaliyyətində Ulu Öndər Heydər Əliyevə, prezidentimiz İlham Əliyevə verdiyi dəyərlə bərabər, həyatının böyük bir hissəsini bəxş etdiyi doğma Naxçıvanında el ağsaqqalı kimi tanınması və adının rəğbətlə qarşılanması bunun bariz nümunəsidir. Ziyalının şəxsiyyəti o zaman bütövləşir ki, onun əməlləri ilə əqidəsi üst-üstə düşür, yaradıcılığı ilə həyat tərzi vəhdətdə olur. Bu zaman geniş anlamda qəbul etdiyimiz “insan” anlayışı ilə tanış oluruq: bu ziyalıdır, bu müəllimdir, bu siyasi xadimdir, bu elm fədaisidir, bu vətəndaşdır – bu İsa Həbibbəylidir.
İnsanların həyatında kimlərinsə təsiri olur həmişə. Bu təsir işıqlı adamlardan olduğunda o, bu işığın tamlığa doğru göstərdiyi yolla gedir. Zənn edirəm ki, damarlarında bəy nəslinin qanını daşıyan İsa Həbibbəylinin həyatında böyük mütəfəkkir Cəlil Məmmədquluzadənin, akademik Abbas Zamanovun və Ümummilli lider Heydər Əliyevin təsiri daha güclüdür. Bəlkə də, məhz buna görədir ki, İsa müəllim sirli, qapalı, qorxulu, müəmmalarla dolu qara rəngi sevmir. O şəffaflığı, ağı, paklığı sevir və buna üstünlük verir. İsa müəllimin həyatının və yaradıcılığının bütün sahələri Ağ yolla gedir.
Mənə yeni vəzifə təklif edəndə qarşıma iki şərt qoydu: sadiqlik və məsuliyyət. Bir də kitabları ilə bərabər bir qutu Naxçıvan duzu verdi. Bu iki söz və əşyavi yazı nümunəsi olan duz hər şeyi deyirdi. Təbii ki, sadiqlik və məsuliyyət istənilən rəhbərin işçisindən gözlədiyi və tələb etdiyi ilk və əsas amildir. Bunun geniş izaha ehtiyacı yoxdur. Amma duz məsələsi vicdanıma oyulmuş bir möhür oldu. Çünki elimizin duza münasibəti hamımıza bəllidir. Tarixin aşılanmasından keçib bu gününə gələn duz kultu bir qutsallığa çevrilib. İsa müəllimin duzu mənə verərkən baxışlarındakı dərinlik çox şeyi ifadə edirdi: duza sədaqət, duz dağı olmaq, duzu tapdalamamaq, duzu artıq etməmək, duz verməyi bacarmaq və duz dağı kimi sabit, uzunömürlü, səxavətli, mərd, yenilməz və sirli olmağı bacarmaq. (Bu yazını yazdığım ərəfədə işdən sonra İsa müəllimin otağında bir kitab üzərində çalışmamızda onun şəxsi albomunu gördüm. Bir az vərəqlədik. O zaman İsa müəllimin duz dağına olan ürək yanğılı məhəbbətinin, heyranlığının, hətta aşiqliyinin ifadəsini gördüm. “Duz dağı mənim romantikamdır” deyən İsa müəllimin albomunda 50-dən çox duz dağı ilə bağlı rəsm vardı. Bir çoxunda isə özü yox idi. Sadəcə sehrli duz dağı vardı.) İsa müəllimin bu duz yükünü çiynimə qoyması onun daima sayğı ilə andığı müəllimləri – professor Əziz Şərifə, professor Abbas Zamanova, akademik Məmməd Cəfərə, professor Yavuz Axundluya qoyduğu ehtiramın və sayğının əlamətini xatırlatdı mənə... Çünki söhbətlərimiz zamanı onlar haqqında kövrələrək danışdığı xatirələr, onların gənclərə və millətimizə göstərdiyi xidmətlərini vurğulaması, daima böyük tutması bir insanın duz-çörəyə olan hörməti idi.
İsa müəllimin 1987-ci ildə Məmməd Cəfər müəllimə yazdığı məktub onun sədaqət simvolu olan duza münasibətinin tərənnümüdür:
"Əziz və unudulmaz ustad, salam!
Sizin mənə çox doğma olan adınız, şəxsiyyətiniz, əsərləriniz, xidmətləriniz, səmimiyyətiniz günlər, illər keçdikcə nəzərlərimdə daha da müqəddəsləşir. "Məmməd Cəfər məktəbi"nin şagirdi olmağımla yalnız fəxr edə bilərəm. Az-çox elmi vərdiş qazanmağım üçün hamıdan çox Sizə, Sizin nümunənizə minnətdaram."
İkinci tərəfdən bu duz qədim diyarımız olan Naxçıvanın simvoludur. Və bunun üçün də duzla bağlı məhz Naxçıvanda yaranan bir alqış var: “Səni görüm duz dağına dönəsən”. Bunun anlamı isə alqışlanan insanın duz dağı kimi əbədi, səxavətli olması deməkdir. Öz yurdu üçün xoş əməllərlə əbədi olması, istər mənəvi, istərsə də maddi tərəfdən dövləti üçün səxavətli olmaq İsa Həbibbəyli prinsipidir. İsa müəllimə, sanki əməlisaleh analarımız milyon dəfə “səni görüm, duz dağına dönəsən” alqışını uca göylərə göndərmişlər ki, bu gün duz dağı və İsa Həbibbəyli anlayışlarının xeyli ortaq cəhətini görə bilirik.
Bir dəfə söhbətlərimizdə belə bir fikir dedi: “Mənim üçün ən yaxşı naxçıvanlı odur ki, o Azərbaycana, azərbaycançılığa xidmət etsin. Yalnız bu cür əməllər sahibi naxçıvanlı olmağı ilə fəxr edə bilər”.
İsa müəllimlə tanışlığımda, dostluğumda, bu məktəbin üzvü olduğum yeddi ay içərisində ondan Cəlil Məmmədquluzadə kimi ətrafındakıları maarifləndirmək və cəhalətdən uzaqlaşdırmaq ideyalarını, akademik Abbas Zamanov kimi elmin inkişafı üçün gənclərə uzatdığı əli, səmimiliyi, qayğını, Heydər Əliyev kimi idarəçiliyi, xarizmatik dünyagörüşü, diqqəti, möhkəm yaddaşı, uzaqgörənliyi gördüm, öyrəndim və öyrənməkdəyəm...
İsa müəllimin qayğısını bir doktorant, bir kadr, bir oğul kimi hiss etmək və görmək çox asan və qürurvericidir. Bu böyük insandan bu cür münasibəti görmək heç də çətin deyil. Demək olar, İnstitutun kollektivi, gənc aspirantlar bu qayğını addımbaşı görür və yaşayır. İsa müəllim, adətən, köməkçisi ilə mənə tez-tez jurnal və qəzetlər göndərir. Bu materialları vərəqləyəndə görürəm ki, hansısa bir məqalənin üstündə aspirant və doktorantlarımızdan birinin adı yazılıb. Bəzən də ad yazılmır, sadəcə, “Biz də bir qızın işi Macar-Azərbaycan ədəbi əlaqələri olmalıdır, ona verin” tipli cümlə yazılıb. Bu cür diqqətli olmaq hər insanın bacara biləcəyi iş deyil. Adını belə tanımadığı bir tədqiqatçıya lazım olacağını düşündüyü məqalələri o qədər işin arasında seçib göndərmək, sadəcə müdriklik əlamətidir. Açığı, mən İsa müəllimi tanıyana qədər elə bilirdim ki, çox aktiv və işgüzar adamam. Lakin altmış beş yaşı haqlamış İsa müəllimi gördükdən, onunla işlədikdən sonra özümü o qədər passiv, astagəl hiss edirəm ki, pafoslu görünməsin, bəzən pessimizmə də qapılıram. Çünki onun sürətinə yetişə bilmirik. Onun diqqətcilliyinin qarşısında çox aciz qalırıq. AMEA kimi mötəbər bir qurumun vitse-prezidenti, İnstitutun direktoru kimi idarəçiliklə məşğul ola-ola, ictimai-siyasi xadim kimi dövlət tədbirlərində iştirak etməklə bərabər, iki tədbirin arasında keçiriləcək hər hansı bir tədbirin dəvətnaməsini belə redaktə etməyə vaxt tapmaq, hazırlanacaq slaydlara şəkillər belə təklif etmək, nəşr ediləcək jurnalları vərəq-vərəq incələmək, sadəcə yüksək zəka sahibinə, millətin taleyini öz taleyi hesab edən seçilmiş insanlara məxsusdur.
Təsadüfi deyil ki, akademik Abbas Zamanovun hələ 1987-ci ildə Naxçıvan Tarix Muzeyinin direktoru Sübhi müəllimə yazdığı məktubda İsa müəllim haqqında bu fikirləri işlətmişdir:
“Möminə Xatun məqbərəsinin şəkli qiyamətdir. Bundan beş-on nüsxə mənə göndərsəniz, əla iş görmüş olarsınız. Bu, mənim xaricdəki dostlarım üçün ən yaxşı hədiyyə olar. Siz tapa bilməsəniz, İsa Həbib tapar. O, qoçaq adamdır, tapar. Hər hansı bir çətinlik onun qarşısında diz çökür. İsa Həbib aləmdir”.
Bir az da İsa Həbibbəyli və Ədəbiyyat İnstitutu haqqında...
Açığı, bir neçə il öncə ölkəmizdə gedən inkişaf Azərbaycan Milli Elmlər Akademiyasında o qədər hiss edilmirdi. Elmin keşiyini çəkən akademiyamıza yeni prezidentin təyin olunmasından sonra bütün institutlarda bir canlanma başladı. İstər kadr siyasəti, istər elmi müəssisələrə yaradılan şərait Azərbaycan Milli Elmlər Akademiyasını ölkənin ictimai-siyasi həyatında nüfuzlu bir qurum kimi yenindən söz sahibi etməyə başladı. Bu baxımdan Akademik İsa Həbibbəylinin Nizami adına Ədəbiyyat İnstitutuna direktor təyin edilməsi ədəbiyyatşünaslıq elmimiz və ədəbiyyatımız üçün böyük bir töhfə oldu. Yarandığı gündən Ədəbiyyat İnstitutunun direktorları ölkə üçün çox əhəmiyyətli insanlar olmuşlar. Bəlkə, elə buna görədir ki, Ədəbiyyat İnstitutunun nüfuzu digər müəssisələrdən daima fərqlənmişdir. Əziz Mirəhmədov, Yaşar Qarayev, Bəkir Nəbiyev kimi böyük alimlərdən sonra, bu instituta rəhbərlik edəcək ən layiqli elm xadimi məhz İsa müəllim idi. Bunu İsa müəllimin institutdakı bir illik fəaliyyətində daha aydın sezmək olar. Belə ki, bir il müddətində Ədəbiyyat İnstitutunda yaradılan “Ədəbi tənqid” şöbəsi, “Mətbuat tarixi” şöbəsi, “Mühacirət ədəbiyyatı” şöbəsi, “Nəşriyyat” şöbələrinin yaradılması, “Ədəbiyyat məcmuəsi”, “Xəbərlər” elmi jurnallarının çapının intensivləşməsi, “Poetika.izm”in təsis edilməsi, “Ədəbi əlaqələr” jurnalını İnstitutun qanadları altına alması, Akademiyanın tarixində ikinci olan yüksək texnologiya ilə təmin edilmiş “Elektron” akt zalının məhz Ədəbiyyat İnstitutunda yaradılması, uzun illər öncə fəaliyyətini dayandırmış “Ədəbi proses” adlı illik hesabat xarakterli konfransın yenidən fəaliyyətə başlaması ədəbiyyatşünaslığın dirçəlməsinə, ədəbi proseslərə ciddi şəkildə münasibətin ortaya qoyulmasına xidmət edir. Elm özlüyündə ağır bir prosesdir. Onu çevikləşdirən və praktik edən isə təhsildir. İsa müəllimin Naxçıvan Dövlət Universitetindən əldə etdiyi təcrübəni Ədəbiyyat İnstitutunda həyata keçirmək arzusu ədəbiyyatşünaslığımız üçün bir ərməğandır. Çünki İsa müəllim Ədəbiyyat İnstitutana Naxçıvan Dövlət Universitetitinin prizmasından yanaşır. Bu da elmi tədqiqat müəssisəsinin imkanlarını genişləndirir, beynəlxalq əlaqələrini formalaşdırır. Bunun nəticəsində də Azərbaycan ədəbiyyatının, ədəbiyyatşünaslığının dünyaya açılması prosesi başlanmış olur. Bu prosesdən isə qazanan, əlbəttə ki, Azərbaycan elmi, mədəniyyəti olur.
Professor Asəf Zamanovun maraqlı bir fikri var: “Elə universitetlər var ki, ora kimi rektor qoysan, onu yüksəldir, çəkisini artırır. Elə müəssisələr də var ki, onları müəssisəyə rəhbərlik edənin şəxsi nüfuzu, ictimai-siyasi ampluası və əzmi daha yüksəklərə qaldırır. İsa müəllim məhz bu cür liderlərdəndir. Bunu Naxçıvan Dövlət Universitetindəki fəaliyyəti də göstərmiş, bu gün Ədəbiyyat İnstitutunda da gedən proseslər sübut edir. İsa Həbibbəyli ideyalarının həyata keçməsində, Azərbaycan ədəbiyyatşünaslığının yenidən və müasir tələblərlə formalaşmasında onunla çiyin-çiyinə işləmək bir zövqdür. Bundan əlavə, bir akademikin xoş və şirin xatirələrinin şahidi olmaq, Abbas Zamanovun dili ilə desək, “bir aləmdir”.
Bu günlər “qızmar günəş” sevdalısı Akademik İsa Həbibbəylinin 65 illik yubileyidir. Artıq İsa müəllim təkcə şəcərəsinin yox, Azərbaycanın, türk dünyasının adamıdır. Dərin zəkaya, müdrik düşüncəyə malik ustadın əlini sıxmaq, doğum gününü üzbəüz təbrik etmək mənim həyatımın önəmli və dəyərli hadisələrindən olacaq!
kitabı