XƏBƏRLƏR

29.07.2019 16:47
Deputatlar abituriyentlərə görə valideynlərə çağırış etdi

11 illik orta məktəb dövrünü başa vuran hər bir şagird abituriyent kimi özünün arzuladığı ixtisasa sahib olmaq istəyir. Əksər hallarda valideynlər bu prosesə müdaxilə edir. Onlar öz istədikləri ixtisası seçib, övladlarını həmin peşənin, ixtisasın sahibi kimi görmək istəyirlər.

Amma düşünmürlər ki, məcburi şəkildə övladlarına nəyisə sevdirmək istəmələri çox pis nəticələr verə bilər. Əslində belə valideynlər özləri də istəmədən övladlarının gələcəklərini alt-üst edirlər.

Valideynlərin ixtisas seçiminə qarışması və abituriyenti istəmədiyi sahəyə təhrik etməsi nə dərəcədə doğrudur?

Qarşılıqlı anlaşma olmalıdır, yoxsa bu işi yalnız abituriyentin öhdəsinə buraxmaq lazımdır?

AzEdu.az mövzu ilə bağlı bir neçə deputata müraciət edib.

Milli Məclisin Elm və təhsil komitəsinin üzvü Deputat Asim Mollazadə deyir ki, valideynlər təbii olaraq uşaqlarının istəklərinə hörmətlə yanaşmalıdır:

“Uşaqların gələcəyi birgə şəkildə müəyyənləşdirilməlidir. Hər hansı bir inzibati qaydada müdaxiləni düzgün hesab etmirəm. Uşaqlar da valideynlərin təkliflərini müzakirə üçün qəbul etməlidir. Yəni bu qərar qarşılıqlı münasibətlər əsasında qəbul edilə bilər”. 

Deputat Musa Qasımlının sözlərinə görə, hər bir abituriyent ixtisas seçimində sərbəstdir:

“Hesab edirəm ki, valideynlər də onların arzu və istəklərini nəzərə almalıdır. Peşə seçmək sevgi məsələsidir. Əgər bir insan istəmədiyi bir sənətə yiyələnərsə, sonradan onun cəmiyyətə heç bir faydası olmaz və o sahə üzrə gələcəkdə işləmək istəməz”.

Deputat Ağacan Abıyev deyir ki, ata-ana övladını daha yaxşı tanıyır, onlar bilir ki, uşağı hansı sahədə uğurlu ola bilər: 

“Bu məsələyə qarışmaq olmaz. Hərdən uşaq bilmir, illər keçəndən sonra anlayır ki, vaxtında ata-ananın sözünə qulaq asmaq lazım imiş. 15-16 yaşlı uşaq hansı təcrübəyə tam olaraq malikdir ki, özbaşına ixtisas seçə bilsin? Bu cür məsələlərdə valideyn mütləq yol göstərməlidir ki, uşaq da düzgün ixtisasa yiyələnsin”.

Xatırladaq ki, ölkə ərazisində iyulun 24-dən etibarən ali təhsil müəssisələrinə ixtisas seçimi başlayıb. Proses avqust ayının 6-dək davam edəcək.

Qeyd: Bu yazı Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyilə həyata keçirilən “Yeni sistemlə imtahan verən abituriyentlərə onlayn psixoloji yardım xidmətinin təşkili” layihə çərçivəsində hazırlanıb.

İlin gənc müəllimi-Müraciət formu