İyunun 2-də Bakı, Şirvan şəhərləri və Naxçıvan Muxtar Respublikasında yerləşən məktəblərin IX sinif şagirdləri üçün keçirilən buraxılış imtahanının II mərhələsinin nəticələrini elan olunub.

Bu imtahanlarla bağlı Dövlət İmtahan Mərkəzinə ən çox daxil olan suallardan biri təhsil sənədinə, yəni attestata yekun qiymətlərin necə yazılmasıyla bağlıdır.

Məlum olduğu kimi, IX sinifdə təhsil alan şagirdlər üçün buraxılış imtahanı “tədris dili”, “Riyaziyyat” və “xarici dil” fənlərindən olmaqla iki mərhələdə keçirilir. Birinci mərhələdə şagirdlərə 45 , ikinci mərhələdə isə 90 test tapşırığı təqdim edilir.

DİM-dən AzEdu.az-a bildiriblər ki, buraxılış imtahanının nəticələri hər fənn üzrə 100 ballıq qiymət şkalası ilə qiymətləndirilir.

Məlumatda deyilir ki, imtahanın birinci mərhələsində şagirdlər hər fənn üzrə maksimal olaraq 30, ikinci mərhələdə isə 70 bal toplaya bilərlər. Yəni şagirdlər attestatına 100 ballıq qiymət şkalası ilə yazılacaq balın 30 faizini imtahanın birinci mərhələsindən, 70 faizini isə imtahanın ikinci mərhələsindən toplaya bilərlər. Əgər şagird hər hansı buraxılış imtahanı fənni üzrə imtahanın birinci mərhələsindən 20, ikinci mərhələsindən isə 60 bal toplayıbsa, deməli, onun attestatına həmin fənn üzrə 80 bal yazılacaq.

Attestata yazılan bal qiymətə çevrilmir və məktəb tərəfindən şagirdə hər fənn üzrə verilən qiymətdən, ayrıca, yəni, fərqli qrafalarda yazılır.

Şagirdin sinifdən sinifə keçməsiylə bağlı buraxılış imtahanında göstərdiyi nəticəyə heç bir məhdudiyyət qoyulmayıb.

Xatırladaq ki, digər zonalar üzrə IX sinif buraxılış imtahanının II mərhələsi 9 iyunda keçiriləcək.