“Məktəbdə müəllimlər şagirdlərlə düzgün rəftar etmir” 

AzEdu.az-ın məlumatına görə, bunu Təhsil nazirinin müavini Firudin Qurbanov “Beynəlxalq Ailə günü”nə həsr edilmiş “Ailə dəyərlərinin möhkəmləndirilməsi cəmiyyətin mənəvi sağlamlığının əsasıdır” adlı konfransda çıxışı zamanı deyib.

Onun sözlərinə görə, hər bir təhsil müəssisəsi cəmiyyət qarşısında böyük məsuliyyət daşıyır:

"Təhsil müəssisələri təkcə təhsil verməli deyil, həm də mənəvi cəhətdən cəmiyyət üçün layiqli insanlar yetişdirməlidir. Təhsil gələcək nəslin formalaşmasında böyük rol oynayır. Cəmiyyətimizə yalnız bilikli, bacarıqlı deyil, həm də yüksək mənəviyyata malik şəxslər gərəklidir. Təhsil sahəsində təlimlə yanaşı, tərbiyəyə də önəm verilməlidir. Buna görə də biz mədəni insan formalaşdırmağa çalışmalıyıq". 

Firudin Qurbanovun sözlərinə görə, hazırda məktəblərdə 1 milyon 600 min şagird təhsil alır, onlara 150 min müəllim dərs deyir: "Bizim hər bir məktəbimizdə psixoloqlarımız var. Biz onların vasitəsilə də şagirdləri formalaşdırmağa çalışırıq".

Nazir müavini son vaxtlar məktəblilərlə bağlı baş vermiş intihar hadisələrinə də toxunub:

"Bu intiharların bir yox, bir neçə səbəbi var. Bəzən ailədə uşağa münasibət pis olur, ailədaxili mühit uşaqların psixikasına mənfi təsir edir. Belə olan halda həkimlər işə qarışmalıdırlar. Və ya bəzən məktəbdə müəllimlər şagirdlərlə düzgün rəftar etmir, ya da şagirdlərə adekvat yanaşmırlar. Biz Təhsil Nazirliyi olaraq bu məsələləri diqqətdə saxlamağa çalışırıq. Bununla əlaqədar Bakıda yerləşən 35 məktəbdə "Məktəblinin dostu" adlı layihəyə başlamışıq. Bunun nəticəsində artıq bir sıra problemlərin qarşısı alınıb. Layihə artıq çox müsbət nəticə verib. Təhsil Nazirliyi gələcəkdə də bu yöndə bir sıra addımlar atmağı planlaşdırır".  

Qeyd edək ki, ümumilikdə 2016-cı ildən bu ilin aprelinə kimi “Məktəblinin dostu” layihəsi çərçivəsində 35 tam orta məktəbdə 9089 münaqişənin qarşısı alınıb. Bunu isə “Məktəblinin dostu” layihəsininrəhbəri Rüstəm Ağayev deyib.

Onun sözlərinə görə, layihəyə başlayan zaman Gürcüstan təcrübəsinə müraciət edilib: 

“Layihə Bakı şəhərindəki 35 ümumi təhsil məktəbində həyata keçirilir. Məktəblərə 4464 dəfə tibbi yardım göstərilib: 

Rüstəm Ağayev orta məktəblərdə şagirdlər arasında psixoloji problemlərin səbəblərindən də danışıb:

“Psixoloqa müraciətlərin səbəbi özünəqapanma, psixiatrik problemlər, davranış pozuntusu, qorxu və fobiya, uşaq-valideyn münasibətlərinin pozulması, dezataptasiya problemi və s. olub. Bu müraciətlərdən ən çoxu dezadaptasiya və uşaq-valideyn münasibətindəki problemlər, davranış pozuntusuna görədir. 1113 nəfər psixoloji mərkəzin xidmətindən yararlanıb”.

Qeyd: Bu yazı Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyilə həyata keçirilən “Yeni sistemlə imtahan verən abituriyentlərə onlayn psixoloji yardım xidmətinin təşkili” layihə çərçivəsində hazırlanıb.