Milli Məclisin sabiq deputatı Elton Məmmədov Azərbaycan Texniki Universitetin strateji inkişaf məsələləri üzrə prorektoru təyin olunub.

Bu məlumatı AzEdu.az-a açıqlamasında ATU-nun  İctimaiyyətlə əlaqələr şöbəsinin müdiri Nicat Abdullayev də təsdiqləyib.

AzEdu.az yeni təyinat alan və ictimai maraq kəsb edən prorektordan münasibət öyrənmək üçün onunla əlaqə saxlayıb.

Elton Məmmədov açıqlamasında bildirib ki, özü haqda danışmağa çətinlik çəksə də, bu təyinatı  yüksək qiymətləndirir:

“Ölkə rəhbərinin xeyir-duası, Təhsil nazirinin yanaşması ilə baş tutan təyinatı yüksək dəyərləndirir və bunu böyük etimad kimi qiymətləndirirəm. Çalışacam ki, etimadı doğruldum. Bu istiqamətdə görüləcək xeyli işlər var.  Bütün işləri ölkə rəhbərinin siyasətinə uyğun həyata keçirməyə hazıram”.

Qeyd edək ki, sabiq nazir Ziya Məmmədovun qardaşı olan Elton Məmmədov uzun müddətdir, Azərbaycan Texniki Universitetində çalışır. 2007-ci ildə   namizədlik dissertasiyasını müdafiə edərək, texnika üzrə fəlsəfə doktoru elmi dərəcəsini alıb. 2013-cü ildə “Neft sənayesinin  ekoloji və texniki problemlərinin  nanotexnoloji aspektləri” mövzusunda  doktorluq dissertasiyası müdafiə edərək,  texnika elmləri doktorluğu dərəcəsini əldə edib.

Hazırda isə  Avtomobil daşımaları və yol hərəkətlərinin  təşkili kafedrasının  professorudur.