Azedu.az
https://modern.az/ https://www.instagram.com/apak.az/
2019-02-19 09:45:00
Fənn olimpiadaları bu cür təşkil edilir – Sualların hazırlanması, mərhələlər və limitlər  

Respublika fənn olimpiadalarının rayon turunun nəticələri artıq məlum olub. 40 % və daha artıq nəticə göstərən şagirdlər növbəti mərhələdə, yəni, Respublika mərhələsinin yarımfinal turunda iştirak etmək hüququ qazanıblar. Naxçıvan Muxtar Respublikası da daxil olmaqla 6 min 332 şagird II turda iştirak edəcək.

Olimpiada nəticələrinin təhsil gündəmində müzakirəsi bir çox şagirdlərin müsabiqəyəmarağına səbəb olub. Respublika fənn olimpiadalarının neçə turdan ibarət olması, şagirdlərin nəyə əsasən müəyyənləşməsi isə çoxlarına maraqlıdır.

AzEdu.az iştirak etmək istəyən şagirdlər üçün fənn olimpiadalarının mərhələləri, imtahana salınan suallarla bağlı  ən zəruri bilgiləri təqdim edir:

Öncə qeyd edək ki, fənn olimpiadalarında IX-XI sinif şagirdləri iştirak edə bilər. Bununla bərabər, xüsusi istedad sahibi olan VIII sinif şagirdlərinin iştirakı üçün də şərait yaradılır. Şagirdin xüsusi istedadlı olması isə fənn müəllimi və məktəb psixoloqunun təqdimatı əsasında müəyyənləşdirilir.

Olimpiadalar Azərbaycan dili və Ədəbiyyat, Tarix, Coğrafiya, Riyaziyyat, Fizika, Kimya, Biologiya, İnformatika fənləri üzrə keçirilir. İngilis dili üzrə fənn olimpiadası yoxdur. Keçirilsə belə, yalnız məktəb daxilində olur və respublika, beynəlxalq tur kimi davamı olmur.

Fənn olimpiadaları necə təşkil edilir?

Fənn olimpiadalarının şəffaf, obyektiv keçirilməsi üçün Yerli və Respublika təşkilat komitələri və apelyasiya komissiyaları yaradılır. Yerli təşkilat komitəsinin tərkibi təhsil şöbəsinin işçiləri, qabaqcıl müəllimlər, valideynlərdən ibarətolur. Bu təşkilata 5 nəfər daxildir. Sədri isə rayon təhsil şöbəsinin müdiridir.

Respublika təşkilat komitəsi isə Təhsil Nazirliyinin əməkdaşlarından ibarətdir. Səlahiyyət müddəti 1 il olan bu komitəyə təhsil nazirinin müavini sədrlik edir.

Olimpiadaların yekun nəticələrindən narazı qalan şagirdlərin yazı işlərinəyenidən baxılması üçün hər fənn üzrə 3 mütəxəssisdən ibarət apelyasiya komissiyası yaradılır.

Rayon və respublika mərhələsi suallarının tərtibi, şagirdlərin yazı işlərinin yoxlanılmasını münsiflər heyəti həyata keçirir. Münsiflər heyətinin səlahiyyət müddəti 1 ildir, tərkibində isə üzrə hər fənn üzrə 5 nəfər təmsil olunur.

Fənn olimpiadalarının mərhələləri

Fənn olimpiadaları 2 mərhələdən – rayon və respublika turundan ibarətdir. Respublika mərhələsi də öz növbəsində 2-yarımfinal və finaldan ibarət olmaqla keçirilir.

Rayon mərhələsi

Fənn olimpiadalarının rayon mərhələsi həmişə yanvar ayının 2-ci bazar günü baş tutur. Bu mərhələdə suallar respublika fənn olimpiadalarının münsiflər heyəti tərəfindən siniflər üzrə və məktəb proqramına uyğun qapalı test formatında hazırlanır. Rayon mərhələsində şagirdlərə fənn və sinifdən asılı olaraq 3 saat ərzində cavablamaq üçün 30-50 sual təqdim edilir.

Bu turda iştirakçıların sayına məhdudiyyət qoyulmur.

Respublika mərhələsinin yarımfinal turu

Republika mərhələsinin yarımfinal turu martın 2-ci bazar günü müəyyən edilmiş mərkəzlərdə keçirilir. Bu mərkəzlər müxtəlif bölgələrdəki ümumi təhsil müəssisələri arasından seçilir.

Respublika mərhələsinin yarımfinal turunda iştirak edəcək şagirdlər rayon mərhələsinin nəticələrinə əsasən müəyyənləşdirilir. Rayon mərhələlərində hər fəndən sualların ən azı 60%-nədüzgün cavab vermək şərtilə, hər sinif üzrə ilk 3 yeri tutmuş şagird yarımfinalda iştirak hüququ qazanır. Gəncə və Sumqayıtdan hər sinif üzrə ilk 5, Bakıdan isə hər sinif üzrə ilk 20 yeri tutan şagird yarımfinalda iştirak hüququ  qazanır.

Bu mərhələnin yarımfinal turunda suallar münsiflər heyəti tərəfindən siniflər üzrə, məktəb proqramına uyğun tərtib edilir. Əvvəlki turla müqayisədə nisbətən çətinləşdirilmiş 10 qapalı test formatında hazırlanır. Şagirdlərə fəndən asılı olaraq 30-40 sual təqdim olunur və cavablandırmaq üçün 3 saat vaxt verilir.

Respublika mərhələsinin final turu

Respublika mərhələsinin final turu aprelin 2-ci bazar günü iki yaş qrupu üzrə keçirilir:

-Aşağı yaş qrupu ( IX siniflər və aşağı)

-Yuxarı yaş qrupu (X-XI siniflər)

Bu turda iştirak edəcək şagirdlər yarımfinal turunun nəticələrinə əsasən Respublika təşkilat komitəsinin qərarı iləmüəyyənləşdirilir. Respublika mərhələsinin yarımfinal turunda hər fəndən sualların ən azı 70%-ni düzgün cavablamaq şərtilə ən yüksək nəticə göstərmiş aşağı yaş qrupu üzrə 20, yuxarı yaş qrupu üzrə isə 40 şagird final mərhələsində vəsiqə qazanır.

Final turunun sualları fənn olimpiadalarının münsiflər heyəti tərəfindən yaş qruplarına uyğun olmaqla açıq formatda hazırlanır. Bu son turda şagirdlərə yaş qrupları nəzərə alınmaqla 5-7 sual təqdim olunur vəcavablamaq üçün 3-4 saat vaxt ayrılır.

Respublika mərhələsinin final turunun nəticələri imtahan başa çatdıqdan 10 gün sonra elan edilir.

Nəticələr məlum olduqdan sonra apelyasiya günü təyin edilir. Nəticələrindən narazı iştirakçılar öz işlərinə yenidən baxılması üçün Respublika təşkilat komitəsinə müraciət edirlər. Belə müraciətlərə apelyasiya komissiyası yenidən baxır və onların verdiyi yekun rəy Respublika təşkilat komitəsi tərəfindən nəzərə alınır.

Respublika fənn olimpiadalarının yarımfinal turunun qalibləri Yerli təşkilat komitələri, final turunun qalibləri isə Respublika təşkilat komitəsi tərəfindən diplom, tərifnamə, qiymətli hədiyyələr və pul mükafatı ilə təltif olunurlar

Lamiyə Süleymanlı
Müəllifin digər yazıları